حكي وقول يا قلم..
عن شعب.. وشهيد..
وعَلَمْ..
ملفوفة بيه جثامين..
*
الشعب كان واحد..
إسلامنا كمان واحد..
عمره ما كان اتنين..
*
وفى لحظة.. والتانية..
جه الشيطان يسعى..
شق صفوف الوطن..
إخوان ومصريين..
...
لِبس عباية الدين
وقال للزمان وَقَفْ..
كارنيهي ..(شرعية)..
...
قال له الزمان.. بُعدك..
دي لعبة منهية..
...
مش هي دى بلدك..
ولا هو ده وطنك..
ولا ده صحيح الدين..
...
كفاياك غباوة بقى..
إسلامكوا.. داء مش دوا..
إسلامنا منه برئ..
اخلع عباية الوطن..
اخلع عباية الدين..
***
وشهيدنا ياسادة..
راجل بمعنى الكلمة..
يوزن م البشر ملايين..
الإسم كان (سامح)..
والوِش متسامح..
يعرف تمام ربه..
يعرف تمام الدين..
...
كان من جنود الله
في الأرض بين خلقه..
يقف مع المظلوم
لحين يجيب حقه..
...
قالوا ده كان ظابط..!!
قلت وإيه يعني؟!
البدلة يا سادة فترة
وبتعدى..
...
ويبقى ذِكر البشر حاضر ليوم القدر..
...
وشهيدنا كان راجل..
عمره ما كان (بدلة)..
عمره ما كان ميال للسُلطة والشهرة..
كان راجل بكلمة حق..
بوقفة حق..
كانت كلمته ليا:
كتير في وقت الصعب..
إيه يعنى بدلة ونجمة..
إيه يعنى نسر وكاب..
الكل يا صاحبي
رحلة نهايتها
تراب..
ونفضل كُلنا ذكرى
للأهل.. والأحباب..
***
كان ملفوف في العلم..
ودمه في إيديا..
وطيت أبوس القدم..
ودمعي في عينيا..
...
خيوط العلم هتفت..
ع الظلمة.. والظالمين..
...
خيوط الكفن نطقت..
مَسَحِتْ غشاوة العين..
قالت لي يا مصري
ليه البُكا والضين..
أنا شرفي النهارده شرف
ممدود ليوم الدين..
كفاني فخر.. وهَنَاَ..
إنه في حضنى أنا ..
نايم ليوم اللُقا..
...
وكفاك يا مصري شرف..
إنك في يوم الحشر..
واحد من بشر سبعين..
مسموح له يشفع لهم..
وبإيده ياخد يدهم
لجنة الخالدين..
***
عصام عبد الفتاح
الأربعاء 25 ديسمبر 2013